-----------------------------------------------------------

Jab bhi hum duniyaa ki chhod kar
apne baare mein sochne baithte hai,
hum humesha do tarah ke khayalon
mein ulajte hai..
yaa to hum khud ke baare mein
bahut achha sochte hai
ya phir bahut buraa..
Kuch aise hi khayalon se bani hai
 yeh nazm...

--------------------------------------------------------- ---


Kabhi Kabhi ehsaas ho jaise mujhsa koi nahi,
khud apni taarif karu, khud se sheekwa koi nahi;
Kabhi Kabhi dil karta hai, khud ko gehri si ek chot du,
aisa na ho dard se uubkar, apna hi galaa main ghot du.

Kabhi Kabhi raah chalta ajnabi bhi apna lagta hai,
pal do pal jo gaur se dekho, pathar bhi chehra lagta hai;
Kabhi Kabhi apne hi dil ko gehri theis lagaate hai,
jeeta jaagte insano ke dil pathar ban jaate hai.

Kabhi Kabhi dil kehta hai, main chhuu sakta hu aasmaan,
thode se phir dil nahi bharta, yu bad jaate hai armaan;
Kabhi Kabhi dil haar maankar, aise peechhe hat ta hai,
saanse bhari ho jaati hai, pal pal mushkil se kat ta hai.

Kabhi Kabhi apni hi dhun mein tanha chalta rehta hu,
girti hui baarish ke boondo se bhi baatein karta hu;
Kabhi Kabhi aalas ke maare din bhar soya rehta hu,
laakh koi puchhe mujhse phir bhi kuch nahi kehta hu.

Kabhi Kabhi bin soche hi hoti hai lafzon ki bochhar,
bin rangon tasveer banao, pal mein nagma ho tayaar;
Kabhi Kabhi main laakh sochkar bhi kuch na likh paata hu,
kya koi murat main taraashu, khud murat ban jaata hu.

--------------------------------------------------------- --------------

Wrote it way back in 2004. .when I used to have these kind of mixed emotions about myself and the world around...
Now.. I dont have emotions.. no time ..

Note : Thanks Nidhi for including "Pyar Humein Phir Milaaega" in your selection of Pearls.
           I dedicate this song to you as a not of thanks..

PYAR HUMEIN PHIR MILAAEGA..